Unsa Zentrum, unsa Schdad
Was iazd oess gschehgn is, d letzdn Joah,
vadeand seh woih a Zei’n, ah zwoa.
Im Zentrum hauma oesse nei
und d gaunze Schdad gwingd mid, dabei.
Es woa woih grad de richdi Zeit,
wei s Gfüh sagd eich, mia san soweid.
Vaändarungen ghean zon Lebm,
aus Oed wiad Nei, so is des ebm.
Da Schdad- und da Gemeinderat
haum gmoand: „Es waa ja wirkli schad,
waun unsa Zentrum koana siahgd,
mia haum ned nua an Bauhnhof kriagd.
Da Rennaplatz is ah gaunz nei,
mid Busbauhnhof und Park dabei.
Drum ghead da Rathausplatz nu grichdd,
fian Moagdplatz güdd de säwe Gschicht.
Ah d Schdraßn olle, zwischndrin,
waan woih fia d Schdad a murdstrum Gwinn!“
Habds eich beratn, woads dafia,
a bessre Glegnheit kimd woih nia.
Da Buagamoasta volla Freid,
sagd: „Waumas machan, daun glei gscheid.
Mia fragn nu d Leit, obs Vurschläg haum,
an Fähla machsd mid sowas kaum!“
Do so a Vurhabm is ned leichd,
da dauat d Planung schau an Eichd.
s wiad grechnd, tüfdld, schpeggulierd,
dass bsundas sche und pragdisch wiad.
Es soi seh ah min Gäd dageh,
sunsd kam ja d Bauschdö schnä zon Schdeh.
Und irgndwaun woa oesse klärd,
drum habds glei aupaggd, so wias ghead.
Da Achideggd und da Polier,
se tragn d Vaauntwourtung dafia.
Und schdehd grad a Problem wo au,
daun häffms zaum, so guad ma kau.
Da Buagamoasta passd dazua,
er had fia d Bauschdö d gwisse Ruah.
En erschdn und en letzdn Schdoa
setzd uawei er, des wü a doa.
Waun hia und da neamd weida woaß,
zweng dem, rennd ah koa Mensch im Kroas.
Es gibd ja oan, den schreggd des kaum,
da guad Polier bringds uawei zaum.
Da Umbau gehd nua Schdüggöweis,
mid Gschigg, mid Muat und rechd vü Fleiß,
habds gschaud, dass s Schdadlebm weidagehd
und oft erklärd, dass jeds vaschdehd.
Grabds d Schdraßn auf und d Gehschdeig ah
und schauds, was oesse z richdn waa.
Glei Brüggal zo de Gschäfda gmachd,
dass sicha is bei Tag und Nachd.
Habds d oedn Kawön aussadau
und s Roahzeigs, des neamd braucha kau.
Glei neiche Kawöschdräng nu zogn,
daun d Röah’l grad glegd oda bogn.
Mid Saund guad zuagschüdd, Schoda drauf,
so bauds en Untagrund gscheid auf.
Rechd schdoak vadichdd, dass hoedad wiad,
drauf d Schdoa glegd oda asphaltierd.
Habds oess „Barrierefrei“ glei baud,
auf olle groadd, auf olle gschaud.
Ah s Woaddehiddl gfoed uns rechd,
waun öfta wer min Bus foahn mechd.
Ob Wochamoagd, ob da Vakehr,
es had oess highaud, was wüsd mehr.
Iazd hauma sauwre Parkplätz gnua
und schene Gehschdeig nu dazua.
Da Post-Wirt had sein Goaddn kriagd,
der rechd guad gnutzd wiad, wiama siahgd.
Mia kinan froh sei, dasman haum,
a Wirt im Zentrum schadd woih kaum.
Habds d Bam und d Schdräucha sche vatäud,
dass uns bei greßda Hitz nix fäuhd.
Frei üwaroe siahgsd Bleamö bliahn,
a gwisse Freindligkeit is z gschpian.
Aufs Regnwassa daun ah nu dengd,
drum habds sein Weg glei richdi glenkd,
dass d Bam und d Schdräucha „gwassat“ wean
und d Wurzln Platz haum zon vamehrn.
Ah d Schpringbrunn san oe zwoa gaunz neih,
a Ruah schdroehns aus, des gschpiad ma glei.
Und d Banggal san zon Rastn da,
ma had des Gfüh, da gehd nix a.
A rechd großs Daungsche muasma sagn,
aun d Oawadda fia d Müah, fias Plagn.
Wei d sauwre Oawad woa eah Zü,
mid Fachwissn, mid gaunz vü Gfüh.
Da Moagd- und ah da Rathausplatz,
se san fia uns iazd wia a Schatz.
Mia haum ja olle was davau,
wei jeda seh glei woihfühn kau.
Des neie Schdadbüd passd in d Zeit
und machd uns nu rechd laung a Freid.
Fia Addnang-Puachhaum iss a Gwinn,
da Umbau kriagd an tiafan Sinn.
Wei unsre Gäst, de wean grad schau,
was unsa Schdad oess had und kau.
Vom Bauhnhof bis zon Moagdplatz drobm
is iazd oess nei, ma kaus nua lobm.
Grad Addnang-Puachhaum had schau oft,
vü mehr draus gmachd, oes wia erhoffd.
Had nachn Kriag glei zoagd wias gehd,
dass koana gaunz alloa wo schdehd.
Wei d Leit haum damoes mid vü Krafd
und Fleiß, en Wiedaaufbau gschaffd.
Es had a jeds woih s Beste gebm,
fia d Schdad, fia d Zukunfd und fias Lebm.
So schliaßd seh heit genau da Kroas,
weis jeda gschpiad und jeda woaß,
dass s Zaumhoedn gaunz wichdi is,
daun is a guade Zukunfd gwiss.
Zon Abschluss mechd i iazd nu sagn,
ma head nua Lob und kaum wen klagn.
Fia Addnang-Puachhaum habds vü dau,
dass jeda seh „Dahoam-fühn“ kau!
Zur Erinnerung an den Zentrums-Umbau in den Jahren 2018 bis 2023. HR
